चैत ५,
सिरहा -स्वतन्त्र मधेसको मुद्दा छाडेर मूलधारको राजनीतिमा आएपछि सीके राउतप्रतिको ‘क्रेज’ घट्दै गएको देखिएको छ। सिरहाको लहानमा आइतबार र सोमबार स्वतन्त्र मधेस गठबन्धनको दुईदिने राष्ट्रिय परिषद् बैठकपछि राउत नेतृत्वमा जनमत पार्टी गठन भएको छ।
मंगलबार बिहान १० बजे लहानमा राउतको स्वागत र्याली र नागरिक अभिनन्दन गरिने प्रचारप्रसार गरिएको थियो। तर, न त नागरिक अभिनन्दन भयो न पहिले जसरी र्यालीमा सहभागी देखिए।
लहानस्थित मारवाडी सेवा सदनमा राउतलाई उनका समर्थकले माला लगाइदिए। र्यालीसहित नगर परिक्रमा गरियो। मोटरसाइलक र्यालीमा करिब दुई सयजति समर्थक सहभागी भए।
समर्थक भन्दा राउतलाई हेर्न र उनको भाषण सुन्न आउनेको संख्या बढी देखियो। त्यसपछि मधेस आन्दोलनका प्रथम सहिद रमेश महतोको शालिकमा राउतले माल्यार्पण गरे। माल्यार्पणपछि राउतले सम्बोधन भने गरेनन्। उनी बोल्दै नबोली सप्तरीतिर लागे।
०७३ साल माघ ५ गते मधेस बलिदानी दिवसका दिन राउत लहान आउँदा हजारौँको संख्यामा उनका समर्थक उपस्थित थिए। प्रहरी प्रशासनलाई भिड थेग्न समस्या परेको थियो। ०७४ माघ ५ गते जनकपुरमा पनि उतिकै संख्या समर्थक देखिएका थिए। गएको माघ ५ गते राउत जेलमै हुँदा पनि राउतका समर्थकले लहानमा मोटरसाइकल र्याली गरेका थिए।
राष्ट्रिय परिषद बैठकमा दुई सय सहभागी भएको बताइएको भए पनि विज्ञप्तिमा डेढ सय सहभागी भएको विवरण सार्वजनिक भयो।
चर्को मुद्दा उठाएर पार्टी राजनीतिमा आएपछि उनको ‘क्रेज’ घटेको लहानका राजनीतिक अगुवा राजेश विद्रोहीको भनाइ छ। फागुन २४ गते सरकारसँग ११ बुँदे सम्झौता गरी स्वतन्त्र मधेसको मुद्दा छाडेपछि उनको समर्थक उनलाई छाड्ने गरेको उनी सुनाउँछन्। ‘आफू नेता हुन मधेसको चर्को नारा उठाएर जनताको भावना भडकाए,’ उनले भने,‘ आफ्नो स्वार्थ पूर्तिका लागि मात्रै नेता मधेसको मुद्दा उठाउने गर्छन्।’
परिषद् बैठकमा पनि मुल मुद्दा छाडेको भनेर केन्द्रीय नेताले असन्तुष्टि जनाएका थिए। स्वतन्त्र मधेसको मुद्दा छाडेर मूलधारको राजनीति आउनु स्वागत योग्य भएको मानवअधिकारकर्मी राजकुमार राउतको बुझाइ छ।
‘पार्टी गठन गरेको छ, जनमत संग्रह र स्वतन्त्र मधेसको मुद्दा बिर्सजन गरेको कुरा आएको छ,’ उनले भने,‘यस्तो निर्णय स्वागत योग्य छ।’ मुद्दा छाडेर मूलधार राजनीतिमा आउँदा समर्थक घट्नु स्वभाविक रहेको उनको बुझाई छ।
राउत नेतृत्वको जनमत पार्टीका केन्दीय सदस्य अब्दुल खान अब संगठन विस्तारमा लाग्ने बताउछन्। ‘अब हामी जनतामा जान्छौँ, चुनावमा भाग लिन्छौँ,’ उनले भने,‘जनताले हामीलाई जे को लागि मत दिन्छ त्यही अनुसार अगाडी बढ्छौँ।’-Annapurna
